ڈیجیٹل میڈیا پالیسی

مقامی اخبارات کیساتھ

ناانصافی ہے، سردار جاوید

عزیز لہڑی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لوکل اخبارات نے قبائلی

تنازعات کے خاتمے میں ہمیشہ

مثبت کردار ادا کیا۔ قبائلی رہنما

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مقامی اخبارات کی بندش سے

بلوچستان ایک اہم آواز سے

محروم ہو جائے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کوئٹہ (پ ر) معروف قبائلی شخصیت سردار جاوید عزیز لہڑی نے صوبائی حکومت کی جانب سے مجوزہ ڈیجیٹل میڈیا پالیسی کی سخت مخالفت کرتے ہوئے اسے بلوچستان کے ساتھ ایک اور ناانصافی قرار دیا ہے۔ اپنے جاری کردہ بیان میں انہوں نے کہا کہ بلوچستان کے مقامی اخبارات نے ہمیشہ عوامی مسائل اجاگر کرنے، قبائلی معاملات کے حل اور مختلف تنازعات کے خاتمے میں انتہائی اہم اور مثبت کردار ادا کیا ہے۔ انہوں نے کہا کہ بلوچستان جیسے وسیع اور حساس صوبے میں لوکل اخبارات نہ صرف عوام کی آواز ہیں بلکہ یہ مختلف قبائل، سماجی حلقوں اور عوامی طبقات کے درمیان رابطے کا موثر ذریعہ بھی ہیں۔ مقامی صحافت نے ہمیشہ امن، بھائی چارے اور عوامی شعور کے فروغ کیلئے خدمات انجام دی ہیں جنہیں کسی صورت نظر انداز نہیں کیا جا سکتا۔ سردار جاوید عزیز لہڑی نے کہا کہ اگر مجوزہ ڈیجیٹل میڈیا پالیسی کے باعث مقامی اخبارات متاثر یا بند ہوئے تو بلوچستان ایک اہم اور موثر آواز سے محروم ہو جائے گا، جس کے منفی اثرات نہ صرف صحافتی حلقوں بلکہ پورے معاشرے پر مرتب ہوں گے۔ انہوں نے کہا کہ پرنٹ میڈیا سے وابستہ سینکڑوں صحافیوں، کارکنوں اور ان کے خاندانوں کا روزگار بھی خطرے میں پڑ جائے گا۔انہوں نے وزیر اعلیٰ بلوچستان میر سرفراز بگٹی سے اپیل کی کہ مجوزہ ڈیجیٹل میڈیا پالیسی کو فوری طور پر ترک کرکے بلوچستان کے مقامی اخبارات، صحافیوں اور میڈیا ورکرز کی ہر ممکن داد رسی اور حوصلہ افزائی کیلئے عملی اقدامات کئے جائیں تاکہ مثبت، تعمیری اور ذمہ دار صحافت کا سلسلہ جاری رہ سکے۔