سیف علی خان حملہ کیس میں فرانزک تحقیقات جاری

ممبئی پولیس نے سیف علی خان کیس میں فنگر پرنٹس سے متعلق افواہوں کی تردید کردی

(ویب ڈیسک)ممبئی
ممبئی پولیس نے بالی ووڈ اداکار سیف علی خان کیس میں ملزم کے فنگر پرنٹس نہ ملنے سے متعلق خبروں کو گمراہ کن اور بے بنیاد قرار دے دیا۔

جوائنٹ کمشنر ستیانیاران چوہدری نے میڈیا میں چلنے والی خبروں کی تردید کرتے ہوئے کہا کہ ایسی افواہیں تفتیش کو الجھانے کی کوشش ہیں تاکہ اصل ملزم گرفتاری سے بچ سکے۔

پولیس کے مطابق، سیف علی خان کے گھر سے 20 سے زائد فنگر پرنٹس لیے گئے ہیں، جنہیں مزید فرانزک تحقیقات کے لیے بھیجا گیا ہے۔

واضح رہے کہ 16 جنوری کو سیف علی خان اپنے گھر میں حملے کے دوران چاقو کے وار سے زخمی ہوئے تھے اور ان کی دو سرجریز کی گئیں، جبکہ وہ پانچ دن تک اسپتال میں زیر علاج رہے۔